Poppekas: Die Drie Klein Varkies

Vandag hou ons poppekas! Ons maak die drie klein varkies en die wolf en bou 'n stel vir ons poppekas.

Behalwe dat hierdie aktiwiteit fyn motorvaardighede, kreatiwiteit en kommunikasie vaardigehede ontwikkel, bied dit jou en jou kleuter ook die geleentheid om buite bou materiaal te versamel. Jy kan ook die konsepte van lig en swaar op 'n praktiese manier verduidelik, terwyl jou kleuter hiermee kan eksperimenteer en dit sodoende internaliseer.

Kleuters sal die konstruksie, versameling, sowel as die uitspeel van die storie vreeslik geniet. Moenie verbaas wees indien daar baie interessante opvoerings van die verhaal geskied nadat jy en jou kleuter dit saam deur gespeel het nie. My kleuter se wolf het wonderbaarlik die steenhuis herhaaldelik omgeblaas en die die gras(strooi) huisie opgeeet.

Let tog daarop dat ons voorbeelde deur 'n twee en 'n halfjarige kleuter gemaak is, ouer kleuters se veel hoer vaardigheidsvlak sal 'n baie verskillende eindproduk verseker!

Mamma's moet asseblief by wees wanneer daar geknip word. En verskoon ons oorbeligte foto's, my kleuter het besluit om kameraman te wees en (soos net 'n kleuter kan) my ligmeter heeltemal deurmekaar gemaak!

Lekker speel!

Benodighede

Inkleurpotlode/viltpenne/vetkryte; sker; 3 velle papier; gom; sosatie/sjinese stokkies of 'n lepel, deurskynende kleeflint; bietjie gras, bietjie stokkies en 'n halwe baksteen/groterige klip.

Metode

Die handpoppe: 

Stap 1:  Teken die drie varkies en wolf se koppe op 'n stuk papier, kleur dit in en knip dit uit. Indien nie jy of jou kleuter kans sien vir self teken nie, kan julle ons voorbeelde uitdruk en inkleur. Daar is ook 'n reeds gekleurde kopie beskikbaar wat slegs uitgedruk en uitgeknip kan word.

Stap 2: Vat jou sosatie/sjinese stokkie of die onderkant van 'n lepel en plaas dit op die agterkant van 'n uitgeknipte kop. Plak lekker stewig vas met kleeflint. Herhaal met al die koppe en jou handpoppe is klaar!

Die stel

Stap 1: Stap deur die tuin of die park en versamel stukkies gras, dun stokkies en 'n halwe baksteen of 'n groterige klip.

Stap 2: Deel 'n vel papier rofweg in drie en knip die stroke uit. Smeer gom op die eerste strook en plak die gras daarop vas. (Strooi huisie se muur.) Smeer gom op die tweede strook en plak die stokkies daarop vas. (Hout huisie se muur.)

Stap 3: Plak die die kant van elke strook aanmekaar sodat dit 'n sirkel vorm. Jy het nou die onderkant van die strooi en hout huise voltooi.

 

Stap 4: Trek twee sirkels op 'n vel papier en knip dit uit. Maak 'n sny tot in die helfte van elke sirkel. Trek die twee punte van die geknipte sirkel effens oormekaar sodat dit 'n kegel vorm en plak vas met kleeflint. Jy het nou die dakkies van huisies gemaak. Sit dit bo-op die muurtjies en jou huisies is klaar. (Jy hoef nie die dakkies op die mure te plak nie.)

Stap 5: Plak die oorblywende strook papier om die baksteen of groterige klip vas. Hierdie huisie hoef nie 'n dakkie te kry nie. Let daarop dat nie een van die huisies presies soos jou idee van 'n huisie hoef te lyk nie. Jou kleuter se verbeelding is sterk genoeg dat suggestie genoeg is.

Jou stel is nou klaar! Rangskik die huisies op 'n lae tafel en voer die storie op saam met jou kleuter. Maak sekr dat s/hy die huisies omblaas. Dit is vet pret!

Kliek op die onderstaande prentjie om dit te vergroot en druk en knip dit uit. 

 

 

  

Kliek op die onderstaande prentjie om dit te vergroot: druk uit, kleur in en knip uit.

 

Geniet kreatief speel met jou kleuter!

Ons hoor graag van julle! Stuur vir ons foto's, opmerkings of e-posse van jul aktiwiteite.

Ballon Muise vir speel en vat!

Ons speel verder met balonne vandag. (Hopenlik het jy nog 'n paar in die pakkie oorgehad!)

Die ballon muise is maklik om te maak en jy kan 'n viltpen  gebruik om die ogies op te teken indien jy nie ogies het om op te plak nie. 

Die ballon muise is ook lekker om aan te vat en te rol en te druk, ouer babas of baie jong kleuters sal so 'n tekstuur ballon baie geniet. Verskillende vulsels sal verskillende teksture verskaf wat tastend verken kan word. Ek sal voorstel dat jy vir 'n tekstuur ballon ogies opteken of glad nie ogies opsit nie. (Minder wat in die mond kan beland.) My kleuter het sy een muis as "deeg" gebruik en vreeslik gerol en gevorm.

Ongelukkig het ek slegs lang ballonne in die kas gehad en ons het met die eerste muis nogal gesukkel om die gort in te kry - ons moes baie opblaas en rek aan die begin. Indien  jy ronde ballonne gebruik, sal julle baie minder mors en sukkel.

Die aktiwiteit kan ook as groepsaktiwiteit vir ouer kleuters en skoolbeginners aangebied word.

Geniet die maak en speel met jou kleuters!

Benodighede

Enige gedroogte vulsel (ertjies/gort/boontjies/sopmengsel); tregter, ballonne, ogies of viltpen; gom (indien jy ogies gebruik).

Metode

Stap 1: Blaas jou ballon 'n paar keer op om dit te rek en makliker te maak om te vul. Indien jy wil kan jy 'n klein knopie aan die voorkant van die ballon maak wat die neus sal vorm. Jy kan eksperimenteer met verskillende "neuse"; ons het vir ons pienk muis slegs 'n knopie neus gemaak en vir ons blou muis 'n neusie vol gort gemaak.

Stap 2: Trek die bokant van die ballon versigtig oor die onderkant van 'n tregter en begin om die ballon bietjie-bietjie te vul. Die vulsel gaan die grootte van die muis bepaal, so julle kan self besluit hoeveel gedroogte vulsel om by te gooi.

Stap 3: Knoop die ballon toe,maar maak seker dat die knoop nie te na aan die vulsel is nie, knoop dit effens weg van die vulsel. Die vulsel sal die hele geknoopte gedeelte vul en die ballon sal genoeg elastisiteit het om nie sommer te skeur indien daar gedruk en getrek word nie. Plak of teken twee ogies op, en siedaar! Jou muis is klaar!

Geniet kreatief wees saam met jou kleuter! 

Hou julle van ons veranderde voorkoms? Laat ons weet!

Baljaar met Ballonne

Ouderdom: 2 - 9                                                                                                                          Het Mamma se hulp nodig
Mamma se geduld vlak: Uiters laag
Koste: Tussen R0 en R12 (Indien jy 'n pakkie balonne aankoop)

Vandag baljaar ons met ballonne! Met al die wonderlike speelgoed wat kleuters het, vergeet ons soms van die plesier wat iets so eenvoudig soos 'n ballon verskaf.

Ons maak vandag 'n raserige skudballon, wat om die arm gedra kan word of op en af met die hand geskud word. Die  ballon maak nogal 'n harde geraas wat kleuters geniet!

'n Gewone reklose raserige ballon sal kleuters net soveel geniet. Die inhoud maak die ballon effens swaarder wat beteken dat hulle dit met meer beheer kan skop, slaan of gooi. Elke keer wat die ballon geskop of geslaan word, maak dit ook 'n geraas.

Peuters en baba's jonger as twee sal ook geniet om die ballon te skud, maar Mamma moet net mooi dophou dat die ballon nie gekou word of bars nie.

Kleuters kan vir 'n lang tyd op hierdie manier besig gehou word en dit is ook 'n aktiwiteit wat binnehuis beoefen kan word. Dit sal ook lekker op partytjies werk.

Lekker speel!

Benodighede

'n Klein bietjie rys, growwe sout, gedroogte ertjies of gort; 'n ballon, 'n rekkie.

Metode

Stap 1: Rek die mond van die ballon oop en gooi 'n klein bietjie rys, sout of gedroogte ertjies of gort in die ballon. Blaas die ballon op.

Stap 2: Terwyl jy die nek van die ballon styf toeknyp, trek 'n rekkie oor en maak 'n knoop. Maak seker dat die rekkie saam vasgeknoop word. Jou raserige skudballon is klaar!

Stap 3: Trek die rekkie om jou arm en beweeg jou arm rond om geluide te maak. Jy kan ook aan die rekkie vashou en die ballon op en af skud om lekker te raas!

Hoop jou kleuter geniet hom/haarself gate uit!

 Jy kan inskryf om ons per e-pos te volg of van ons op facebook hou om op hoogte te bly!

 

Gesigverf!

Ouderdom: 2-9                                                                                                             Het Mamma se hulp nodig om aan te maak
Mamma se geduld vlak: Baie laag
Koste: R0 (Alles is in jou huis) 

Vandag maak ons ons eie gesigverf!

Dit is baie maklik en goedkoop om die gesigverf te maak en verskaf ure se genot. Die verf is lekker dik en kan met 'n kwas aangeverf word, maar 'n vinger werk net so goed of beter.

Die verf kan met 'n lap afgevee word of met seep en water afgewas word. Donker kleure soos blou en rooi kan die vel liggies vlek, maar sal binne 'n paar uur (of na badtyd) verdwyn. Ek sal egter voorstel dat julle nie die verf gebruik net voor 'n belangrike fotosessie nie!

Omdat die verf lyfroom as 'n basis gebruik behoort dit sensitiewe velle nie te affekteer nie.

Die verf is nie eksklusief gesigverf nie - jou kleuter kan sy hele lyf verf!

Benodighede

Dik lyfroom, mielieblom (Mazeina), voedselkleursel, bakkie(s) en 'n lepel.

Metode

Meng die dik lyfroom en mielieblom in 'n 2:1 verhouding. (M.a.w. twee hoeveelhede lyfroom en een hoeveelheid mielieblom) Voeg 'n druppel voedselkleursel by en meng baie goed.

Jou gesigverf is reg!  Geniet dit!

Geniet jou kleuter se kreatiwiteit!

Teken in om Kreatiewe Kleuter weeklik per e-pos te ontvang en hou van ons op Facebook!