Tergende Tangram

Ouderdom: 2 - 12                                                                                           Het Mamma se hulp nodig met uitlegging en skepping
Mamma se geduld vlag: Uiters laag
Koste: R0 (Alles is in jou huis)

Vandag maak en speel ons met 'n Tangram. 'n Tangram is 'n eeue-oue Chinese speletjie wat jou kleuters, voorskolers, skoolbeginners en ouer kinders lank sal besig hou. Die Tangram bestaan uit sewe vorms: 'n vierkant, vyf driehoeke en 'n langwerpige ruitvorm, wat gebruik word om 'n groot verskeidenheid dinge te bou, bv. mense, bote, diere, huise, kortom, enige iets.

Kinders kan hul eie verbeelding gebruik om vorms te bou, maar daar is ook boeke en webwerwe wat jou uitdaag om allerhande ingewikkelde patrone en dinge na te bou.

Jonger kleuters sal heelwat aanmoediging benodig, maar dit is 'n wonderlike manier om hulle van vorms bewus te maak, asook hoe verskillende vorms 'n nuwe geheel kan maak. Die aktiwiteit is goed vir analitiese en kreatiewe denke ontwikkeling, probleem oplosvaardigheidsontwikkeling en fyn motoriese ontwikkeling.

Ek vermoed jy gaan net so lekker soos jou kleuter speel!

Benodighede

Gom, papier, sker, oorskiet karton, gekleurde papier, potlood, liniaal.

Metode

Stap 1: Indien jy nie 'n stuk gekleurde karton het nie, maak vir jou een deur 'n stuk gekleurde papier op 'n stuk oorskiet karton soos 'n ou ontbytgraanboks of die agterkant van 'n skryfblok te plak. Indien jy nie gekleurde papier het nie, kan jy wit papier inkleur en versier.

Stap 2: Trek 'n 12cm by 12cm vierkant op die gekleurde papier. (Let wel: die diagram is nie op skaal nie.)

Stap 3: Trek 'n lyn deur die middel van die vierkant om dit in twee ewe groot driehoeke te verdeel. Jy behoort nou twee vorms te he. (Let wel: die diagram is nie op skaal nie.)

Stap 4: Meet en merk die middelpunte van die boonste driehoek se kort sye, m.a.w. 6cm van die hoek of. Trek 'n lyn tussen die twee punte, die lyn sal m.a.w. parallel met die middellyne loop. Jy behoort nou drie vorms te he. (Let wel: die diagram is nie op skaal nie.)

Stap 5: Plaas jou liniaal op die middellyn van die vierkant sodat dit die middellyn wat jy reeds getrek het kruis. Trek nou 'n lyn vanaf die hoek tot by die boonste parallel lyn. Jy behoort nou vyf vorms te he. (Let wel: die diagram is nie op skaal nie.)

Stap 6: Trek 'n reguit lyn van die middelpunt van die halveerde middellyn tot by die einde van die boonste parallele lyn. Jy behoort nou ses vorms te he. (Let wel: die diagram is nie op skaal nie.)

Stap 7: Trek 'n reguit lyn vanaf die middel punt vanaf die anderkant se gehalveerde middellyn tot by die hoek van die halveerde middellyn en parallele lyn. Jy behoort nou vyf driehoeke, 'n vierkant en 'n ruitvorm te he. (Let wet: die diagram is nie op skaal nie.)

Stap 8: Knip die sewe vorms versigtig uit. Siedaar, jou tangram is klaar en reg om mee te speel!

Ons het die volgende prentjies gebou. Kan jy ons namaak? As jy klaar is, bou jou eie en stuur vir ons die foto's!

 Vis, boot en kat

Gesiggie, Sjinese mannetjie en 'n hond

Geniet kreatief wees saam met jou kleuter!

 Deel gerus jul voltooide prentjies en terugvoer met ons, ons hoor graag van julle! Julle kan ook met ons op Facebook kommunikeer. 

Suursuiker!

Ouderdom: 2 - 9                                                                                                                Het Mamma se hulp nodig
Mamma se geduld vlak: Uiters Laag

Koste: R0 (Alles behoort in jou koskas te wees, maar indien jy Kremetart of Koeksoda moet aankoop sal dit jou tussen R3 en R6 uitwerk.)

Vandag maak ons suursuiker (sherbet) om die einde van die skoolkwartaal (suur) en die begin van die vakansie (suiker) te vier!

Ouer kleuters kan die resep op hul eie maak en behoort die suursuiker gate uit te geniet, veral as hulle dit met 'n stokkielekker kan eet of deur 'n strooitjie kan opsuig.

Jonger kleuters sal die maak geniet, veral as hulle kan sif (en mors). Hulle mag egter nie so baie van die smaak hou nie!

Nadat julle die betrokke porsies uitgeskep het, kan die orige suursuiker in 'n lugdigte houer op 'n droe plek (nie die yskas nie) gestoor word. Dit behoort lekker lank te hou!

Geniet die bak en brou!

Benodighede 

Bestandele:
250ml versiersuiker
7ml kremetart (tartaric acid)
7ml koeksoda (bicarbonate of soda)

Ander benodighede: Sif, Maatlepels, Maatbeter en twee mengbakke.

Metode

 Stap 1: Plaas die sif op 'n mengbak en gooi al die bestandele daar in.

Stap 2: Sif die bestandele drie maal. Indien daar enige klontjies in die sif agter bly, vryf dit met die vingers deur. (Ons het die twee bak metode gebruik. Ons het in die eerste bak gesif, dit sif op die tweede bak gesit en die eerste bak se inhoud in die sif gegooi en dit herhaal totdat die mengsel drie maal gesif is.)

Stap 3: Eet jou voltooide suursuiker met 'n stokkielekker (of jou vinger) uit 'n bakkie! Alternatief kan jy 'n groot opgehoopte eetlepel in 'n koevert gooi. (Ons het 'n groot gebruikte koevert geneem en net kleiner gevou.) Plak die koevert toe en steek 'n strootjie in die een hoek. Knip die strootjie bietjie korter en jy't 'n pakkie suursuiker wat jy suig-suig kan eet in die loop.

Geniet dit om saam met jou kleuter te bak en brou!  

Vind en hou van ons op Facebook en vertel ons hoe julle die suursuiker geniet het.

Maak 'n reenwolk

Ouderdom: 2 - 9                                                                                                                       Het Mamma se hulp nodig
Mamma se geduld vlak: Uiters laag
Koste: R0 (Alles is in jou huis)

Vandag maak ons 'n reenwolk met papier, verf en kleeflint.

Alle ouderdomme sal dit geniet om met vingerverf te werk! Indien julle nie vingerverf in die huis het nie, soek gerus ons inskrywing rondom die maak van vingerverf op. Dis is spotgoedkoop en vreeslik maklik om te maak. Die aktiwiteit kan egter ook met vetkryte of potlode voltooi word.

Jonger kleuters sal die verf gedeelte meer geniet as maak van die wolkie, moedig hulle aan om nog te verf en te eksperimenteer terwyl die verf op die wolkie droog raak. Mamma of Pappa sal moet hand gee om die wolkie te voltooi.

Ouer kleuters behoort die hele aktiwiteit op hul eie te voltooi met minimale insette van Mamma of Pappa. Die knip en vou is goed vir fyn motoriese vaardigheidsontwikkeling, terwyl die verf kreatiwiteit ontwikkel en jou kleuter toe laat om met tekstuur en kleur te eksperimenteer.

Nadat my kleuter op sy speelgoed en die hond "gereen" het, het ons sy wolkie in sy venster geplak vir 'n vrolike venster versiering.

Hoop julle geniet die aktiwiteit net soveel soos ons.

Benodighede

Papier; verf (of inkleur potlode/vetklryte); liniaal; potlood/pen; sker; deurskynende kleeflint.

Metode

Stap 1: Teken die buitelyne van 'n vriendelike wolkie op 'n vel wit papier. Verdeel 'n vel A4 papier in 8 dele met behulp van 'n potlood en 'n liniaal. Gebruik vingerverf om die wolkie en die hele vel papier te versier.

Stap 2: Wanneer jy klaar is, sit die papier in die son of op 'n warm plek neer om droog te raak. Onthou om jou hande te was voor jy aan enige iets anders vat! Wanneer die verf droog is, knip versigtig op die lyne en knip die agt stroke uit.

Stap 3: Vat die eerste twee stroke en sit die ente op mekaar sodat dit 'n agterstevoor "L" of 'n regte hoek vorm. Gebruik kleeflint om dit vas te plak. Begin by die onderste strook en vou dit oor die boonste strook. Vou nou weer die onderste strook oor die boonste strook.

Stap 4: Herhaal Stap 3 totdat jy beide stroke "opgevou" het en plak die boonste punte aan mekaar vas. Indien jy die gevlegde strook uitrek, lyk dit nou amper soos 'n gevlegde wurm! Maak nou so met al die oorblywende stroke, totdat jy vier gevlegde wurms het.

Stap 5: Knip die wolkie versigtig uit. (Mamma of Pappa kan vir jonger kleuters die papier rondom die wolkie kleiner knip. Dit maak dit makliker vir jou kleuter.) Plak 'n lang stukkie kleeflint op die bokant van een van die wurms en plak die oorblywende deel aan die agterkant van die uitgeknipte wolkie. Hou so aan totdat al vier wurms vas geplak is. Siedaar, jou wolk is klaar!

 

 Geniet kreatief wees saam met jou kleuter!

 Stuur gerus vir ons foto's van jul voltooide projekte. Laat weet ons ook van watter aktiwiteite julle die meeste hou. Julle kan van ons hou op Facebook of inteken om op hoogte te bly!

  

Vou 'n storie, 'n bakkie en 'n hoedjie

Ouderdom: 2 - 9                                                                                                                         Het Mamma se Hulp nodig
Mamma se geduld vlag: Vreeslik Laag
Koste: R0 (Alles sal in jou huis wees)

Ons vou vandag 'n storie! Dieselfde vou tegniek kan gebruik word om 'n bakkie vir partytjie kos te maak of 'n trein bestuurder en/of polisieman pet.

Ouer kleuters behoort die storie en korresponderende vou aktiwiteite maklik te memoriseer en te bemeester. As kinders het dit ons ure besig gehou om die bakkies te vou en om dit vir ons maats te leer. Dit was naby aan toor!

Jonger kleuters sal die storie en die uiteinde geniet, alhoewel hulle nog nie self die vouwerk kan doen nie.

Die aktiwiteit is goed vir kreatiewe ontwikkeling, fyn motoriese vaardigheidsontwikkeling; retensie en luister vaardighede.

Die storie word in pers vertel saam met die stappe en die idee is dat jy vertel soos jy vou.

Geniet die vertel, vou en speel!

  

Benodighede

Inkleurpotlode/kryte; sker; papier.

Metode

Stap 1: (Voorbereiding) Jou kleuter kan een helfte van die papier versier, dit sal die eindproduk opwindender maak. Wanneer die versiering klaar is, vou die boonste kort sy na die lang sy. Gebruik 'n pen of kryt om 'n lyn op die papier te trek, terwyl jy die dubbel gevoude driehoek as gids gebruik. Vou die oop deel van die driehoek na die toe deel. Die papier behoort nou soos 'n "huisie" te lyk.

Stap 2: (Voorbereiding) Knip versigtig op die lyn wat jy getrek het. Gooi die dun strook wat jy afgeknip het weg en vou die driehoek oop. Jy behoort nou 'n vierkant met vier gevoude lyne te he.

Stap 3: Ek het olifant biltong gemaak en besluit om vir jou 'n bietjie te stuur. Omdat ek op 'n eiland bly, sit ek dit in 'n pakkie en vou dit versigtig toe.

Draai die papier sodat die wit kant na bo wys. Vou die vier hoeke na die middelpunt sodat jy weer 'n vierkant kry.

Stap 4: Ek besluit toe om vir jou 'n briefie te skryf en vou dit ook versigtig toe.

Draai die gevoude papier om en vou die vier hoeke na die middelpunt sodat jy weer 'n vierkant kry.

Stap 5: Ek sit die biltong en brief in 'n groot koevert en skryf jou adres op.

Draai die gevoude papier weer om en vou dit in die helfte.

Stap 6: Ek plak twee seels op die koevert en sit die pakkie op 'n boot.

Hou die gevoude reghoek sodat die middelste driehoek na onder wys. Vou die regterkantste driehoek na agter en die linkerkantste driehoek na voor. Jou gevoude papier moet nou soos 'n driekhoek lyk.

Stap 7: Daar kom 'n wind op en die boot span sy twee seile.

Druk jou vinger in die middel van driehoek bo, en druk die twee boonste hoeke na mekaar toe. Die gevoude papier moet nou 'n vierkant vorm wees wat op een hoek staan. Gebruik die boonste flap en vou die boonste hoek na die onderste hoek, m.a.w. vou die flap dubbel. Draai die gevoude papier om en doen dieselfde aan die anderkant. Jou gevoude papier sal nou weer 'n tipe vierkant verteenwoordig.

Stap 8: Ongelukkig verander die wind in 'n storm en die kaptein beveel die matrose om die seile te stryk.

Druk jou vinger aan die buitekant van die vierkant in en vou die flap oop. Vou die boonste hoek na die onderste hoek om 'n driehoek te vorm. (Vou met ander woorder die flap in die helfte). Draai die gevoude papier om en herhaal die proses aan die ander kant. Jou gevoude papier moet nou in die vorm van 'n driehoek wees.

Stap 9: Die storm veroorsaak reuse golwe wat binne die boot inslaan en die boot begin sink. Gelukkig is daar reddingsbote aan boord en die kaptein beveel dat die reddingsboot opgeblaas moet word. Nou kan almal en al die pakkies op die reddingsboot klim.

Draai die driehoek sodat punt na bo wys. Aan die bokant sal jy sien dat daar vier hoeke is wat daar bymekaar kom. Trek elkeen van die hoeke versigtig uit, waneer al vier uitgetrek is, sal dit 'n boot vorm maak. Ek vind dit die maklikste om eers die "voorkant" se twee hoeke uit te trek en dan die papier om te draai en die agterste twee punte uit te trek.

 

Stap 10: Die reddingsboot vat langer as die boot om by land uit te kom en die kaptein raak verveeld. Hy vou jou brief oop, lees dit en vou dit verkeerd toe. Hy maak jou pakkie oop, eet jou olifant biltong op en vou die pakkie verkeerd toe.

Trek die enkel flappie aan die onderkant van die bootvorm uit en vou dit heeltemal oop. Vou die boonste en twee kantste hoeke na die middelpunt om 'n vierkant te vorm. Vou die vierkant in die helfte na onder om 'n reghoek te vorm. Draai die gevoude papier om en herhaal. Jy behoort nou 'n gevoude reghoek met twee "handvatsels" te he.

Stap 11: Die reddingsboot land en die poskantoor kom laai jou pakkie by jou huis af, maar toe die pakkie by jou aankom is dit leeg!

Vat aan elke "handvatsel" flap en trek die gevoude papier oop. Jy het 'n bakkie met handvatsels gevou! 

'n Paar variasies op die tema... 

Vou 'n bakkie!

Volg die boonste stappe om die bakkie te vou, maar gebruik gekleurde papier. Plak die flappies met deurskynende kleeflint aan die onderkant vas.

Jy't nou 'n goedkoop bakkie wat jy vir kinders partytjiekos, koekies, tjippies of lekker kan gebruik. Die bonus? Jy hoef dit nie te was nie en jy hoef nie bekommerd te wees dat dit breek nie!

Vou 'n Treinbestuurderpet of 'n polisieman se hoed
 

Stap 1: Volg die stappe om 'n bakkie te maak, maar gebruik 'n stuk koerant papier. Draai die bakkie om en druk die twee los flappies aan die kant in. Plak dit vas. Vou een van die "handvatsel" flappe terug en plak aan die onderkant met kleeflint vas.

Stap 2: Gebruik bree deurskynende kleeflint en plak 'n strook ook die oorblywende flap om dit te verstewig. Plak ook 'n strook kleeflint oor die kant van die bakkie net bo die flap. Jy kan jou hoedjie nou verf of versier.

Sit jou hoed op jou kop en speel!

Geniet kreatief wees saam met jou kleuter!

Stuur gerus foto's on van jul voltooide projekte. Soek en hou van ons op Facebook!