Vensterverf!

Ouderdom: 2 - 9                                                                                            Ek kan dit op my eie doen (nadat Mamma gehelp aanmaak het)

Mamma se geduld vlak: Baie laag

Koste: Ongeveer R5 vir 'n boksie bordkryt, die res het jy in jou huis!

Wanneer die wind deur murg en been sny of die reen neerstort buite, werk vensterverf soos 'n bom om 'n kleuter op 'n prettige en kreatiewe manier besig te hou! Dit is vreeslik maklik en goedkoop om te maak, maar jy kan ook vensterverf te koop kry by sommige supermarkte teen ongeveer R28 vir twee buise.

Tuisgemaakte vensterverf vee baie maklik skoon en jy kan dit op vensters of spieels gebruik. My kleuter het dit ook vreeslik geniet om daarmee in die bad te speel. Dit kan met die vinger, 'n spons, 'n borsel of 'n kwas aangewend word. Pappa het self ingespring met venster versierings en dit het in 'n heerlike gesinsaktiwiteit  een vakansie oggend ontaard!

 

Benodighede

Gekleurde bordkryt, skottelgoedseep, stamper en vysel (of enige iets wat jy kan gebruik om die bordkryt mee fyn te maak), houertjie vir die verf.

 

 

Metode

Stap 1: Besluit watter kleur vensterverf jy wil maak en maak die bordkryt(e) in die gekose kleur fyn. (Een kryt lewer ongeveer 3 teelepels verf op.) Hoe fyner die kryt hoe beter die verf.

 

Stap 2: Meet die hoeveelheid fyn bordkryt af en meng met presies dieselfde hoeveelheid skottelgoedwasmiddel. (Ons het sommer teelepels gebruik om mee te meet.) Roer tot goed gemeng en verf! Orige verf kan in 'n lugdigte houer gestoor word.

 

 

verf en versier!

 

 

Gee jou verbeelding vrye teuls en verf saam met jou kleuter!

 

Ons volgende aktiwiteit sal op Vrydag, 5 Julie gepubliseer word.

 

Bak en Brou: Koekies teen die Koue!

Ouderdom: 2 - 9                                                                                                                                            Het Mamma se hulp nodig!

Mamma se geduld vlak: Laag

Koste: Hang af van wat jy in jou huis het, maar ek skat jy sal ongeveer R20 se aankope moet doen. (Behalwe as jyonder andere 'n plak sjokolade en 'n klein boksie smarties in jou koskas het!)

‘n Heerlike dekadente koekie om die die winterkoue weg te hou! Dit is nie baie gesond nie, maar ‘n heerlike manier om die begin van die vakansie te vier! 

Die resep is gebaseer op die Amerikaanse “Monster Cookies”, maar ek het die resep heelwat aangepas om dit ietwat gesonder te maak.

Menigte ma’s het al gesê dat baktyd soms moeilik is, want elke kind wil alles ingooi! Ek het dus die resep so gedeel dat die hele resep vir elke kind gemaak moet word. Almal kan dus van alles ingooi en roer. Die resep lewer ongeveer 12 koekies.

Ek en drie hulpvaardige kleuters tussen die ouderdomme van 1½ en 3½  het die koekies gebak en hulle kon alles self doen. Ingooi, roer, proe, uitskep, voel, aflek en baie bestandele eet! Jy hoef dus nie te bekommerd te wees om alles presies af te meet nie… Ouer kleuters, voorskolers en skoolbeginners sal die grootste deel van die resep op hul eie kan maak. Mamma sal net moet help met die oond en die mes!

Lekker bak en brou!

 Bestandele

½ koppie grondboontjie botter (enige tipe) 

^1/₃ koppie suiker (enige tipe, bruin of wit, ons het strooisuiker gebruik, want die gewone suiker was op!)

2 eetlepels botter

1 eier

5 ml vanielje ekstrak (vanilla essence)

1 ^1/₃ koppies kits hawermout (instant oats)

½ teelepel bakpoeier

²/₃ van ‘n plak sjokolade

‘n klein boksie smarties

Voorverhit die oond na 180°C en spuit ‘n bakplaat met kleefwerende sprei of voer dit uit met bakpapier.

Stap 1

Gebruik ‘n groot mengbak en houtlepel om die grondboontjie botter, suiker en botter te meng. My bakkers is nog jonk, so ek het vooraf alles vir hulle uitgemeet en in bakkies gesit wat hulle kon uitkrap. 

Dit was sommer ‘n lekker sensoriese oefening ook, aangesien hulle met die hande ingespring het.

 Stap 2

Dit botter moet goed ingemeng word en nadat die kleuters vir ‘n tydjie geroer het, het ek elkeen se mengbak met ‘n handklitser vir ongeveer 60 sekondes geklits om die drie bestandele lekker te meng. 

 

Ouer kleuters en kinders sal van die begin af die elektriesie klitser (onder toesig) kan gebruik.

Stap 3

Meng die eier en vanielje ekstrak by.

Stap 4

Kap die sjokolade effens kleiner en voeg by. Voeg die smarties by en meng. (Hierdie stap was redelik gewild, hande vol smarties en sjokolade stukkies is mond toe!)

Stap 5

Voeg die hawermout en bakpoeier by en roer tot goed gemeng.

Stap 6

Skep lepelsvol uit en plaas op die gesmeerde bakplaat. (Ons bolletjies was effens groter as ‘n okkerneut) Bak vir 10 tot 12 minute, maar wees versigtig om te lank te bak. Laat die koekies goed afkoel voordat julle begin eet en die res in ‘n lugdigte houer bêre!

Die koekies is baie bros wanneer hulle warm is, so moenie skrik as jy ‘n warm koekie optel en dit verkrummel nie. Sodra hulle goed afgekoel is, is hulle gebind!

Ek hoop julle geniet die aktiwiteit net soveel soos ons. Lekker bak en brou saam met jou kleuter(s)!

Vadersdag Vreugde!

 

Ouderdom: 2 - 9                                                                                                                                            Het Mamma se hulp nodig!

Mamma se geduld vlak: Laag

Koste: R0 (Jy kan dit doen met alles wat jy in die huis het. Indien jy 'n foto moet laat maak kan dit jou tussen R3 en R5 kos.)

Om vir Pappa baie dankie te sê dat hy so hard werk en lief is vir ons het ons vir hom ‘n trekker en ‘n motor kaartjie vir Vadersdag gemaak. Ons het ook vir hom ‘n fotoraam staander gemaak, sodat hy dit op sy lessenaar kan plaas. Ons het verder ‘n maklike raampie vir ‘n prentjie of ‘n briefie van ‘n papierbord gemaak.

Jou kleuter se ouderdom sal bepaal watter tipe van kaartjie s/hy kan baasraak. Skoolbeginners het daarvan gehou om hul eie trekker of motor te teken of om dit af te trek van ‘n voorbeeld. Voorskoolse kinders het verkies om die getekende trekker of motor in te kleur. Kleiner kleuters sal ywerig help, maar Mamma sal moet meer as ‘n wakende oog hou! Skryf of teken vir Pappa ‘n briefie om agterop te plak, Mamma kan presies neerskryf wat die kleuter sê, dit is baie spesiaal om so ‘n briefie te kry.

Dit is nie nodig om gekleurde papier aan te koop nie, jou kleuter kan wit papier inkleur of versier. Al die aktiwiteite benodig ‘n skêr en knipwerk, Mamma moet dus maar ‘n ogie hou!

Benodighede  

Wit papier, gekleurde papier, karton, gom, skêr, inkleur potlode, vetkryte, foto’s, maskeerband, lee ontbytpap houer, deurskynende kleeflint.

Trekker

Julle kan liewer 'n motor maak indien verkies! Volg dieselfde stappe, maar met 'n motor buitelyn.

Teken die buitelyne van ‘n trekker op ‘n stuk papier so groot soos verlang en knip dit uit. Gebruik die patroon om die trekker op ‘n gekleurde vel papier af te trek. Jy kan die besonderhede van die trekker nou inteken, of wag totdag jy klaar jou foto geplak het. Knip die venster gedeelte van die trekker uit.

Plak die onderkant van jou foto met maskeer band aan die agterkant van die trekker vas. (Die maskeerband trek maklik af en dit keer dat die foto rondskuif terwyl die buitelyne van venster daarop afgebring word. Anders mag frustrasie dalk vinnig-vinnig insluip!) Trek die buitelyn van die dak van die trekker versigtig op die foto af. Trek die maskeerband af en knip aan die binnekant van die lyn wat getrek is. Plak nou die foto met maskeerband vas en knip die maskeerband wat uitsteek versigtig af. Teken die besonderhede van die trekker in, indien jy dit nog nie gedoen het nie.

Alternatief 1 (Makliker opsie): Teken vir Pappa ‘n prentjie en skryf vir hom ‘n briefie op ‘n vel wit papier. (Mamma kan neerskryf presies wat die kleuter sê op die kaartjie moet staan.) Trek die buitelyne van die trekker op die prentjie en briefie af en knip dit uit. Smeer gom aan die agterkant van die trekker en plak die prentjie gedeelte versigtig af. 

Alternatief 2 (Moeiliker opsie): Smeer die agterkant van die trekker gom en plak die trekker op ‘n vel wit papier. Gebruik ‘n skêr om die oortollige wit papier versigtig af te knip. Skryf nou vir Pappa ‘n briefie of teken vir hom ‘n prentjie op die wit gedeelte.

Gee vir Pappa met liefde!

Fotoraam vir Pappa se Lessenaar

Nou sal Pappa sommer lekkerder werk!

Sny ‘n vel gekleurde karton  of riffel karton in die helte deur en plaas ‘n foto in die middel van een van die helftes. Hou die foto vas met jou een hand terwyl jy die buitelyne van die foto met die ander trek. Trek ‘n tweede lyn ongeveer 1mm aan die binnekant van die eerste lyn. Gebruik ‘n skêr en knip versigtig op die binneste lyn om ‘n raampie te vorm. Plaas die foto aan die agterkant van die stuk karton en plak met maskeerband vas. Jy behoort nou ‘n foto in ‘n raampie te hê!

Maak die ontbyt papboks oop en sit jou fotoraam plat op die boks neer. Trek die buitelyne versigtig af en knip dit uit. Jy behoort nou ‘n stuk van die ontbyt papboks te hê wat net so groot soos jou fotoraam is. Smeer die agterkant van jou fotoraam gom en plak die uitgeknipte stuk karton daaraan vas.

 

Teken ‘n skewe reghoek op die oorblywende dele kartonboks en knip dit uit.Gebruik deurskynende breë kleeflint om  die strook aan die bokant van die fotoraam vas te plak. Buig die strook om en jy het ‘n fotoraam wat kan staan!

Gee vir Pappa om in sy kantoor te sit en elke dag aan jou te dink!

Alternatiewe Trekker

 

Kleur die trekker in en teken ‘n prentjie van jou en Pappa in die venster.

 Motor

Jy kan ‘n motor in stede van ‘n trekker maak.

Papierbord Raampie

 

Gebruik ‘n gekleurde papierbord om ‘n raampie vir ‘n prentjie te maak. Teken ‘n prentjie of skryf ‘n briefie. Meet die grote van die binneste deel van die papierbord en knip die prentjie of briefie uit. Smeer gom aan die agterkant van die tekening of briefie en plak in die middel van die papierbord vas.

Siedaar, ‘n spoggerige raampie vir ‘n prent of brief!

Gelukkige vadersdag aan alle liefdevolle vaders! Geniet die kreatiewe projekte saam met jou kleuter!

Stuur gerus foto's van jul eindprodukte! Vind ons op Facebook!